Andre Onana po vuan në Angli te Manchester United, skuadër ku u transferua gjatë verës për 55 mln euro. Portieri nga Kameruni, mbylli një sezon fantastik me Interin, ndërkohë që nuk po e përsërit veten te “Djajtë e Kuq”.

Pasiguri, gafa dhe shumë kritika. Tifozët e United kërkojnë rikthimin e David De Geas mes shtyllave të skuadrës së zemrës. Ndërkohë që trajneri Erik ten Hag vijon të mbrojë Onanan.

27-vjeçari beson se do të rikthehet në formën e ditëve më të mira, njësoj si edhe skuadra e United. Që e ka nisur shumë keq sezonin e ri, duke regjistruar 3 fitore dhe 6 humbje mes Premier dhe Champions League.

ESPN raporton se Onana po merr në konsideratë të mos garojë me kombëtaren e Kamerunit në Kupën e Kombeve të Afrikës, që do të zhvillohet gjatë muajit janar.

Sipas një burimi të afërt me “gardianin”, prioriteti i tij është të fokusohet tek United pas fillimit të vështirë të sezonit, ku në disa raste ka ndëshkuar skuadrën me gabimet e tij.

Gjithsesi, Onana do të marrë vendimin përfundimtar pas bisedës që do të zhvillojë me drejtuesit e Federatës së Futbollit të Kamerunit.